Најголемата тајна на економската моќ на Германија е стручното образование, рече заменик амбасадорот на Германија при посетата на Техничкото училиште во Битола

Кабинетите по физика и практична настава – електроенергетика во Техничкото училиште ,,Ѓорѓи Наумов“ од Битола кои се опремени со грант од германската амбасада, денеска ги посети заменик амбасадорот на СР Германија во нашата држава, д-р Петар Шалер, симболично предавајќи ги во употреба.

Грантот од Амбасадата изнесува 5500 евра, додека помошта  од Општина Битола за докомплетирање на кабинетите е во висина од 230 000 денари. Професорката по физика Донка Наумовска пред заменик амбасадорот демонстрираше како се користат дел од нагледните средства во кабинетот  по физика.

– Многу сум среќен денеска што сум во посета на Техничкото училиште во Битола, овде го поддржавме финансиски опремувањето на двата кабинети и тоа го сторивме од нашиот фонд, за мали грантови. Со наши средства на Амбасадата, го сторивме тоа зошто прокетот  беше многу добро подготвен и што гледаме многу смисол во понатамошната стручна обука на учениците. Најголемата тајна на економската моќност на Германија е токму стручното образование. Таа комбинација од универзитетско и стручно образование би сакале да се практикува и во Македонија. Образованието е чувствителен сегмент во секоја држава и сметаме дека е добро што даваме придонес во оваа област, рече заменик амбасадорот на СР Германија,  д-р Петар Шалер  при посетата на новите кабинети во Техничкото училиште.   

Општина Битола се вклучи во проектот оценувајќи дека е важен момент во образованиот процес во градот.

– За добар воспитно-образован процес за вистинска успешна настава секако најпотребно нешто се нагледните средства, така  се подига интересот на учениците,  но и можноста директно да ги гледаат  појавите и процесите кои треба да ги стекнат како теоретско знаење преку практично согледување на нештата. Овој ден е значен за воспитно-образовниот процес во нашата општина, рече градоначалничката Наташа Петровска.

Директорот на СОТУ ,,Ѓорѓи Наумов” Владимир Роме, рече дека се прават напори да се подобрат состојбите и условите за настава во Техничкото училиште за што се  лобира да се искористат сите расположливи ресурси  на Општина Битола,  на приватни форми и странски донации.

– Денеска ми е чест што ги пуштаме во употреба овие два кабинети, искрена благодарност до амбасадата на Германија и Општина Битола. Донацијата е сосема доволно за да опремиме  два кабинети со нормални услови за работа и учениците да се стекнат со знаења преку квалитетна опрема која ќе може да ја применат во практични цели. Кабинетите се со доста опремени нагледни средства во кои што учениците ќе можат да го најдат своето креативно во себе и да постигнат подобри резултати во наставата. Кабинет по физика немавме, опрема никаква, наследивме ужасна состојба во образованието, гледаме дека можеме и поинаку и се трудиме да ги искористиме сите ресурси на општината и нашите познанства со фирми низ градот и амабасадите, кои ни излегуваат во пресрет, рече директорот на СОТУ ,,Ѓорѓи Наумов”, Владимир Роме.

Прокетот го координираше професорката Билјана Маринова, која целосно се посвети и на неговата реализација.

– Изразувам огромна благодарност до Амбасадата и до сите соработници коишто многу помогнаа во подобрувањето на условите за настава за нашето училиште.  Благодарност и до општина Битола, рече Маринова.

Средното општинско техничко училиште ,,Ѓорѓи Наумов“ од Битола во јуни годинава го доби грантот од Амбасадата на Германија за опремување на дел од училишните кабинети.

Прилогот е преземен од интернет порталот Апла.

Во продолжение е даден видео прилогот преземен од ТВ Тера.